छोटो समयमा ठूलो सफलता—‘उडि जाउँ भने’ले ११ लाख भ्यूज पार्यो

भोला सुबेदी (प्रणव) 

काठमाडौं । आगामी वैशाख ११ गतेदेखि प्रदर्शनमा आउने तयारीमा रहेको फिल्म ‘परालको  आगो’को गीत ‘उडि जाउँ भने, म पन्छी होइन’ले दर्शकको राम्रो साथ पाएको छ। सोमबार ओएसआर डिजिटलको युट्युब च्यानलमार्फत सार्वजनिक गरिएको गीतले छोटो समयमै ११ लाखभन्दा बढी भ्यूज हासिल गरेको हो। 

गीतले दैनिक २ लाखभन्दा बढी भ्यूज बटुल्दै ट्रेन्डिङमा उक्लिएको छ। समाचार तयार पार्दासम्म गीतलाई करिब १५ हजार लाइक र ८ सय ५० भन्दा बढी कमेन्ट प्राप्त भएका छन्, जसमा अधिकांश प्रतिक्रिया सकारात्मक छन्।दर्शकले गीतमा देखिएका कलाकार सुहाना थापा र प्रकाश सपुतको अभिनयको खुलेर प्रशंसा गरेका छन्। कमेन्टकर्ता रेनुका घलानले सुहानाको लुक्स र पहिरनको तारिफ गरेकी छन् भने समिर सुनारले आफू सुहाना र प्रकाशका फ्यान भएको उल्लेख गरेका छन्। 

अर्की प्रयोगकर्ता अन्जु थापाले गीतप्रति आकर्षण व्यक्त गर्दै “जति सुने पनि सुनिरहन मन लाग्ने” प्रतिक्रिया दिएकी छन्। समग्रमा दर्शकबाट गीतप्रति सकारात्मक प्रतिक्रिया आइरहेको देखिन्छ।

गीतको भिडियोमा सुहाना थापा, प्रकाश सपुत र बाल कलाकार मञ्जिला बानियाँको अभिनय रहेको छ। भिडियोमा उनीहरूको अभिनयसँगै रामजी लामिछानेको कोरियोग्राफीलाई पनि दर्शकले मन पराएका छन्। गीतका अंशहरूमा आधारित टिकटक तथा फेसबुक रिल्स समेत बन्न थालेका छन्।

चार दशकअघि चर्चित बनेको यस गीतलाई पुनः रेकर्ड गरी नयाँ पुस्तामाझ ल्याइएको हो। मूल रूपमा गायिका अरुणा लामाले गाएको गीतलाई यसपटक निशु शर्माले स्वर दिएकी छन्। शान्ति ठटालको संगीत रहेको गीतमा शब्द मनबहादुर मुखियाको छ भने एरेन्ज बिनोद भुजेलले गरेका छन्।

गीतप्रति दर्शकको साथले निर्माण पक्ष पनि उत्साहित देखिएको छ। निर्माता सुशील पोखरेलले छोटो समयमै गीतले पाएको प्रतिक्रियाप्रति आभार व्यक्त गरेका छन्।  संकल्प भुजेलले खिचेको यस गीतमा प्रकाश ब्यबस्थापन र  ग्याफ़रको राम्रो काम देखिन्छ । ग्याफ़र गोपाल राया  भन्छन " हामीलाई यस गीतमा  कलर र प्रोजेक्सन फरक देखाउनु थियो मेहेनत अरु भन्दा ६० प्रतिशत नै बढी लागेको थियो , भिडियो राम्रो आयो हाम्रो क्यामेरा टिम खुसि छ " उनि भन्छन ।

गुरु प्रसाद मैनालीको कृतिमा आधारित फिल्ममा सुहाना थापा, सौगात मल्ल, प्रकाश सपुत, सिर्जना अधिकारी लगायत कलाकारहरूको अभिनय रहेको छ। लक्ष्मण सुनार निर्देशित फिल्मलाई आरआर फिल्म्सले वितरण गर्नेछ भने डिजिटल अधिकार ओएसआर डिजिटलसँग रहेको छ।

गुगल प्लसमा राख्ने

चित्र खबर डट कम

चित्र खबर डट कम संसारको जुनसुकै कुनामा भएका बिभिन्न घटनाहरु, सुचना, जानकारी, मनोरन्जन, समाचार तथा विभिन्न रोचक र रमाइला खबरहरु पस्कने गर्ने वेवसाइट हो । विशेष गरि नेपाल र देश बिदेशमा समेत रहनु भएका नेपाली समुदायप्रति लक्षित रहेर हामी प्रस्तुत हुन्छौं ।